ಮತ್ತೆ ಮತ್ತೆ ಬೇಕೆನಿಸುತ್ತದೆ

ಪ್ರವೀಣಕುಮಾರ್ ಗೋಣಿ

ಸುಖಾಸುಮ್ಮನೆ ಕಾಲವಲ್ಲದ

ಕಾಲದೊಳಗೆ ಸುರಿದು

ಸುಮ್ಮನಾಗುವ ಮಳೆಯಂತೆ

ವಿನಾಕಾರಣ ಕಂಗಳೊದ್ದೆಯಾಗುವಾಗ

ನಿನ್ನ ಅಂಗೈಯ ಬಿಸಿಯನ್ನ ಕೆನ್ನೆ ಬಯಸುತ್ತದೆ .

ಜಿಗಿ ಜಿಗಿಯೆನಿಸುವ ನಗರವೆನ್ನುವ

ನಾಗಾಲೋಟದ ಜಾತ್ರೆಯು

ಸಾಕೆನಿಸಿ ಒಬ್ಬಂಟಿಯಾಗಿ

ತಿರುಗಿ ಬರಲು ದಾರಿಯೇ ಇರದ

ದುರ್ಗಮ ಕಾಡೊಳಗೆ ಕಳೆದುಹೋಗಿಬಿಡಬೇಕೆನ್ನುವ

ಕಾಂಕ್ಷೆ ಕಾಡಿದಾಗಲೆಲ್ಲ ನನ್ನಯ

ಕಿರುಬೆರಳು ನಿನ್ನ ಹಸ್ತದ ಕೊಂಡಿಗೆ ಕಾತರಿಸುತ್ತದೆ .

ಹುಲ್ಲು ಹಾಸಿನ ಮೇಲೆ ಬೆನ್ನ ಚೆಲ್ಲಿ

ತಾಕುವ ತಂಗಾಳಿಗೆ ಎದೆಯೊಡ್ಡಿ

ಕಣ್ಣು ತೆರೆದಷ್ಟು ವಿಶಾಲವಾದ

ಆಗಸಕ್ಕೆ ಹೃದಯವನ್ನರ್ಪಿಸಿ

ದಂಡಿಯಾಗಿ ಮಿನುಗುವ

ನಕ್ಷತ್ರಗುಚ್ಛಗಳನ್ನ ಎಣಿಸುತ್ತ ರಾತ್ರಿ

ಕಳೆದುಬಿಡಬೇಕೆನ್ನುವ ತವಕ ಕಾಡಿದಾಗಲೆಲ್ಲ

ಪಕ್ಕದಲ್ಲಿ ನಿನ್ನ ಬಿಸಿಯುಸಿರಿನ ಪುಳಕಕ್ಕೆ

ಮನಸು ಹಾತೊರೆದು ಹಣ್ಣಾಗಿ ಹೋಗುತ್ತದೆ .

ಪ್ರವೀಣಕುಮಾರ್ ಗೋಣಿಯವರ ಮತ್ತಷ್ಟು ಬರಹಗಳನ್ನು ಓದಲು ಇಲ್ಲಿ ಕ್ಲಿಕ್ಕಿಸಿ.