ಉಂಟೆ !?

ಪ್ರವೀಣಕುಮಾರ್ ಗೋಣಿ

ಮಾಯೆಯೆನ್ನುವ ಮಿಥ್ಯದ 

ನರ್ತನದ ತೆಕ್ಕೆಗೆ ಸಿಕ್ಕಿ 

ದುರುಳ ಮನಸಿನ 

ವಶವಾಗುವ ಸ್ಥಿತಿಗಿಂತ 

ಹೀನತೆ ಬೇರೊಂದು ಉಂಟೆ ?

ತೀರದ ದಾಹಕ್ಕೆ 

ತೊರೆಯಲಾಗದ ಮೋಹಕ್ಕೆ 

ಅಂತ್ಯವಿರದ ವಾಸನೆಗಳ 

ಸೆರೆಯಿಂದ ಬಿಡಿಸಿಕೊಳ್ಳಲಾಗದ 

ಪಾಮರತೆಗಿಂತ ಬೇರೆ ನಿಕೃಷ್ಟತೆಯುಂಟೆ ?

ಮಸ್ತಕದೊಳಗಿನ ಮಣಭಾರದ 

ಜ್ಞಾನವನ್ನೇ ಅರಿವ ಕಿರೀಟವಾಗಿಸಿಕೊಂಡು

ತನ್ನ ತಾನೇ ಜ್ಞಾನಿಯೆಂದು 

ಭಾವಿಸಿಕೊಂಡು ಬೀಗುವ ಭ್ರಮೆಗಿಂತ 

ಮತ್ತೊಂದು ಅಜ್ಞಾನ ಉಂಟೆ ?

ಜ್ಞಾನ ಅಜ್ಞಾನದ ಗೊಡವೆ 

ಇರದಂತೆ ವಿಹರಿಸುವ 

ಹಕ್ಕಿಗಳ ಹಿಂಡು ಬೋಧಿಸುವ 

ಸ್ವಚ್ಛಂದದ ಪಾಠಕ್ಕಿಂತ 

ಮಿಗಿಲಾದ ಬೋಧೆ ಮತ್ಯಾವುದಾದರೂ ಉಂಟೆ ?