ಉಪಲಬ್ಧತೆ

ಪ್ರವೀಣಕುಮಾರ್ ಗೋಣಿ 

ಎದೆಯ ಬಾಗಿಲ ತೆರೆಯದೆ 

ಬಂದು ಪವಡಿಸುವನೇ ಪರಮಾತ್ಮ ?

ಭೋಗದ ಬಲೆಯಲ್ಲಿ ಸಿಲುಕಿ 

ಕಾಣೆಯಾಗಿಹ ಮನಕೆ ತಾಕೀತೆ 

ಅವನ ಬರುವೆಯಾ ಪುಳಕ ?

ವಿಧ ವಿಧದ ವಾಸನೆಗಳ ಸುಳಿಯಲ್ಲಿ 

ಸಿಕ್ಕಿ ಕೊಳೆಯಾಗಿಹ ಮನದ 

ಬಿಡದಂತಾವರಿಸಿದ ಜಂಜಡಗಳ ಸರಿಸಿ 

ಹೊಳೆವ ಸ್ಪಟಿಕದಂತಹ ಅವನರಿವು 

ಗೋಚರಿಸಿ ಅಂತರಾತ್ಮವ ಬೆಳಗೀತೆ ?

ಬಯಸುತ್ತ ಶಿರ ಬಾಗುವ ಆಸೆಬುರುಕ 

ಮನಕೆ ತನ್ನ ತಾ ಅಡಿಯಾಳಾಗಿಸದೆ 

ಲೆಕ್ಕಾಚಾರದಲೆ ಮುಳುಗುವ ಹುಚ್ಚುತನವ 

ಬಿಡದೆ ಅವನ ಬೆನ್ನತ್ತಿದರೆ 

ತಾ ಬಂದು ಪವಡಿಸುವವನೇ ? ಶಕ್ತವಿಲ್ಲದಾ 

ಹೃದಯದಲ್ಲಿ ಉಪಲಬ್ಧಿಯಾದಾನೆ ?