ಹುಡುಕಿಕೊಡಿ

ಪ್ರವೀಣಕುಮಾರ್ .ವೀ.ಗೋಣಿ, ಹುಬ್ಬಳ್ಳಿ
ದೈನ್ಯದಿಂದ ಕೇಳುತಿರುವೆ ದೀನನಾಗಿ
ದಾನವನಾಗಿ ಕಳೆದು
ಹೋಗಿರುವವನ ಹುಡುಕಿಕೊಡಿ ದಯಮಾಡಿ .

ಸರಿವ ಕಾಲದ ತೊರೆಯಲಿ
ಬಿಡದೆ ಕಾಡುವ ಜಂಜಡಗಳ ಅಡಿಗೆ
ಸಿಲುಕಿ ನರಳುವವನ ಹುಡುಕಿಕೊಡಿ .

ತನ್ನ ಇರುವನೇ ಮರೆತು ಜಗದ
ಗದ್ದಲದ ಅಡಿಗೆ ಸಿಕ್ಕಿ ಬೇಕುಗಳ
ಬೆನ್ನತ್ತಿ ಕಳೆದು ಹೋಗಿರುವವನ ಹುಡುಕಿಕೊಡಿ .

ಪ್ರೀತಿ ,ವಾತ್ಸಲ್ಯಗಳ ತೊರೆದು
ಬರಿ ಸ್ವಾರ್ಥ ಸಾಧನೆಯ ದಂಡಕಾರಣ್ಯದೊಳು
ಕಳೆದು ಹೋಗಿರುವವನ ಹುಡುಕಿಕೊಡಿ .